Para que redactar un texto propio cando Fran P. Lorenzo informou perfectamente a través de Dioivo? Copio e pego:

Mentres Oriente e Occidente se unen nese cruzada fóbica contra gais, lesbianas e transexuais, hai lugares nos que mesmo a vivencia relixiosa da homosexualidade está a lograr unha normalización inédita. Dinamarca, por exemplo, debate hoxe [14 de marzo] no seu parlamento unha lei que será previsibelmente aprobada en xuño, e que permitirá os matrimonios homosexuais nas igrexas dinamarquesas. O texto, froito dunha promesa eleitoral de 2010, apóiano os tres partidos da coalición gobernamental de centro-esquerda e a alianza roxi-verde Lista Única.

Desde hai unha década Dinamarca, onde non existe separación entre Estado e Igrexa, xa permitía unha sorte de benzón nos templos do país para as parellas de gais e lesbianas, casadas civilmente. Agora con esta medida, que conta coa oposición dos sectores máis conservadores de Igrexa Nacional Luterana malia respectar a vontade dos pastores de exercer ou non o casorio, dáse un paso máis na normalización plena dos dereitos homosexuais, nun terreo tan espiñento e fértil para a homofobia como é o da relixión. Dinamarca ponse así á cabeza, canda España, Islandia, Portugal, Suecia, Noruega, Sudáfrica, Canadá ou Bélxica, desoutra liga internacional de Nacións Unidas contra a Homofobia, nas que, malia os progresos evidentes, aínda queda moito por facer e por batallar.

{Ler o texto completo}
{Máis info en Church of Denmark#Same-sex marriage}

Ugens fiskepige, é dicir, moza pescadora da semana. Que é isto? Pois a moza que cada semana sae seleccionada na revista dinamarquesa Fisk og Fri (máis ou menos, Peixe e Lecer). Un reclamo impactante para atraer lectores. As fotografías pódense consultar aquí. Que conste que hai semanas onde non é moza senón mozo, é dicir hai fiskefyr.

{Fonte: 9gag}

O 6 de xuño de 1969 a coñecida revista norteamericana Time informaba do paso adiante do goberno dinamarqués en materia sexual:

O primeiro de xullo [de 1969], Dinamarca converterase no primeiro estado da historia moderna en abolir toda sanción legal contra a pornografía para adultos. Este fito adquiriu o status de oficialidade a pasada semana, cando o Parlamento dinamarqués aprobou por incontestable maioría a lexislación necesaria. De feito, dado que o propio goberno pasa por alto deliberadamente o cumprimento da lei vixente, pode dicirse que Dinamarca goza xa da devandita distinción -así como tamén se erixe no primeiro país asinante da Convención de Xenebra sobre Literatura Obscena* en desvincularse do acordo-. Nos últimos meses, calquera cidadán dinamarqués maior de dezaseis anos puido satisfacer a vontade o seu apetito pornográfico, ben con libros, filmes ou fotografías de todo tipo nas que se observan dende unha copula convencional até unha orxía.

* Un acordo internacional asinado por 48 países membros que ten por obxectivo evitar a circulación e intercambio de publicacións obscenas.

O artigo completo está hoxe dixitalizado e é accesible no propio sitio web de Time, iso si, en inglés.