Datos para a reflexión: segundo o artigo do New York Times titulado Define Gender Gap? Look Up Wikipedia’s Contributor List no que se explora a diferenza de sexos existente entre os editores da Wikipedia, hai 6,7 editores homes por cada muller. Este dato foi foi facilitado pola fundación Wikimedia; mais, segundo o API que rexistra os datos da Wikipedia acerca do xénero dos editores, a porporción sería aínda peor, de 12,9 a 1, polo menos nos 3.000 artigos analizados.

{Fonte: Microsiervos}

O 6 de setembro de 2012 a Wikipedia en galego acadou os 90.000 artigos. O artigo co que se logrou a cifra sinalada foi Xogos Paralímpicos de Londres 2012‎. Moitos e sinceros parabéns a editores, lectores e galegofalantes en xeral.

“A 3 de agosto de 2012 os 20 editores máis activos en canto a creación de artigos da versión en galego de Wikipedia fixeran o 46,5% dos artigos totais (41.315 dos 88.859).”

{Fonte: Táboas de datos da edición en gl.wiki}

Aproveitamos a entrada de hoxe para dar difusión ao evento organizado pola Galipedia este sábado en Compostela.

A Wikipedia en galego vén de acadar os 75.000 artigos únicos, con máis de 2.000.000 de edicións e case 30.000 usuarios rexistrados, dos cales 300 son usuarios activos. Esta bonita restra de cifras ben vale de escusa para a organización dun galencontro, que terá lugar este sábado 17 de setembro entre as 10.30 e as 14.00 horas.

Trátase dunha xornada aberta sobre a Galipedia, e a ela queda convidado a todo o público interesado, sen importar o seu grao de coñecementos sobre a edición wiki. Aquelas persoas que así o desexaren poden achegarse á Cidade da Cultura, onde, na sala 2 da Biblioteca de Galicia, un grupo de galipedistas conformado por administradores e usuarios moi activos, impartirá un obradoiro de edición, ao que seguirá un coloquio aberto.

Non é imprescindible mais si é moi recomendable traer o ordenador portátil da casa, pois traballaremos conectados á WIFI da biblioteca.

Fragmento da crítica feita por Armando Requeixo.

Non hei ser eu quen trate de (des)convencer a ninguén sobre o (in)verosímil do festivo sexual de Lorena e Gloria, dama de honor e noiva que, nos días previos ao casamento desta última, deciden trebellar intensamente con todo canto apañan nos momentos e lugares máis insospeitados. Nin tampouco caerei na crítica fácil da falta de credibilidade dos diálogos ou da súa manifesta escaseza, pois, por riba de todo o anterior —sexa ou non—, préstame convidar a que se fisgue no volume, inzado de bo humor e desenfado, gaudium venéreo ao que, se consegue alegrar (no sentido que se queira), ben pouco máis pode pedírselle nestes tempos de crise, tan pouco excitantes.

{Fonte: Blog Criticalia}

Á UNESCO e aos Estados signatarios da Convención do Patrimonio da Humanidade:

o noso apoio á proposta de recoñecer a Wikipedia como Patrimonio da Humanidade porque temos o convencemento de que Wikipedia é unha obra mestra do xenio creativo humano así como tamén un valor humano universal. Por favor, consideren a proposta de Wikipedia para devir o primeiro sitio dixital co rango de Patrimonio da Humanidade.

Que nolo explique Jimmy Wales:

Hoxe toca entrada sobre cultura libre, e moi divertida.

The Wiki Game é un xogo que consiste en ligar dúas entradas da Wikipedia mediante clics nas ligazóns internas. As entradas poden resultar dispares até o ridículo, e para acabar de complicar as cousas existe un tempo límite e outros usuarios que tratan de facer exactamente o mesmo ca nós. O máis curioso é que o camiño entre a entrada de orixe e a de destino pode resolverse as máis das veces entre cinco e oito saltos.

Por se isto non fose suficiente, existen 5 modalidades distintas de xogo: ‘O camiñante máis rápido’, ‘ O camiño máis curto’, ‘Seis graos de separación’, ’5 clics até Xesuscristo’ e ‘Sen os EUA’.

Malia ter como base a Wikipedia (en.wiki) o xogo non forma parte da Fundación Wikimedia senón que se trata dunha iniciativa particular de Alex Clemesha.

Sorte e maña.

O graffiteiro Banksy é cada vez máis famoso para o gran público. A súa pintada na que aparecen debuxados un marido celoso, a súa muller en roupa interior e o amante nu pendurado da fiestra, foi feita da noite para a mañá nunha clínica de saúde sexual en Park Street, Bristol. A imaxe deveu tan popular que, logo dunha enquisa en liña, o concello decidiu que permanecese. E con razón. Os Banksys orixinais véndense hoxe a razón de decenas de miles de libras, e os catálogos e libros de imaxes do artista tampouco non vendan nada mal.

As pintadas de Banksy teñen un aquel claro de rebeldía antisistema que non obstante acaban abrazándoo, sobre todo a medida que gañan en popularidade. Todo bloque de edificios soña con que unha noite Banksy lle faga unha trasnada.

En 2010, BccN 1ª Mostra de cinema Creative Commons foi a primeira de tales características no mundo.

Na edición 2011, do 18 ao 22 de maio, BCCN será un festival realizado baixo licenza Creative Commons e baixo a premisa ‘copia este festival’, con licenza Atribución NonComercial-Compartir Igual. Isto significará que o propio festival podera ser descargado, copiado, reversionado, distribuído e proxectado de maneira gratuíta en calquera recuncho do mundo.

Con isto, quérese promover a organización do mesmo evento en diferentes lugares do mundo, multiplicando o efecto divulgador do acontecemento e reducindo o traballo de montaxe do festival ás súas particularidades loxísticas.

A estas alturas hai que estar bastante despistado para non se decatar que O divino ferrete ten todos os contidos de seu liberados cunha licenza Creative Commons. Dende a música, os logos e ilustracións ou os relatos até as entradas do blog, o propio guión, ou o filme que aínda está por chegar e que colgaremos aquí mesmo. Por este motivo, saudamos o documental ¡Copiad, malditos! que TVE emitiu hai apenas uns días e que explica meridianamente ben o cambio de modelo(s) que viven as chamadas industrias culturais. Invitáronnos a copiar e así o facemos: