Gonzalo Vázquez, o noso responsable de vestiario, presenta colección, por iso traemos esta nova que onte aparecía publicada en La Voz de Galicia na súa versión dixital.

A igrexa da Universidade de Santiago acollerá este xoves, 10 de novembro, ás 21.00 horas un fashion show de Gonzalo Vázquez, a través do cal o deseñador galego inaugurará a súa primeira tenda en liña e presentará a súa primeira colección prêt-à-porter, MEAT&DREAM, con propostas para este outono-inverno.

O evento mesturará moda e arte, integrando as pezas da nova colección nun espectáculo artístico que se retransmitirá en directo a través de Youtube. A colección de alta costura ideada polo modisto galego está inspirada no universo cinematográfico de David Lynch e na poesía de Paul Celan, con pezas de corte sobrio e elegante seguindo a liña da marca GV e a súa aposta pola moda actual e urbana.

Gonzalo Vázquez conta xa cunha recoñecida traxectoria na confección a medida. Durante os últimos anos vestiu as producións máis destacadas da música e o teatro galegos, presentando as súas pezas en mostras de Galicia, Barcelona e Italia.

{Fonte: La Voz de Galicia}

Entre os nosos referentes temos o Saló del sexe en català, unha iniciativa a cargo do Festival Internacional de Cine Erótico de Barcelona que contou con tres edicións, a primeira en 2006 en Manresa, e que tiña por obxectivo normalizar o sexo en lingua catalá. Lamentablemente, este Festival xa non se celebra (e non sen polémica).

Por outra banda, o que aínda temos é o Salón Erótico de Barcelona, un festival de renome que non perdeu nada de fol; ao contrario: cada ano acapara un maior interese mediático; Nesta ocasión celebrarase do 6 ao 9 de outubro, é dicir, dentro de nada.

Con esta escusa, aproveitamos para informar dunhas votacións que están a ter lugar estes días: as de mellor actriz porno e mellor actor porno do Estado. Nesta última, hai unha nova que no Ferrete nos interesa enormemente:

Totó García vai segundo nas votacións!

Aínda hai tempo para votar e chimparlle ese primeiro posto que neste momento ostenta Nacho Vidal.

Foder na cociña. Escoller unha receita afrodisíaca para seducir os comensais. Detectar doces e salgados nos corpos. Comer chocolate despois dun fantástico orgasmo. Quedar para cear e acabar na cama. Converternos en pratos exquisitos envoltos en finísimas sabas… O mundo do sexo e da gastronomía estiveron sempre moi unidos. Tanto, que incluso as veces chegan a confundirse.

Para potenciar a compatibilidade destas dúas disciplinas, a galega Mónica Novas creou un novo concepto: a gastrosexoloxia, unha mestura entre sexo, psicoloxía e gastronomía. Porque, do mesmo xeito que facer o amor pode converterse nunha actividade rutinaria e aburrida, traballar detrás dos fogóns, mesmo comer, pode chegar a ser un suplicio.

A gastrosexoloxía non ofrece unha receita máxica, pero propón claves e trucos para o éxito (e o éxtase): 1. Deixar fluír os cinco sentidos para idear, preparar e saborear novos pratos. 2. Facelo en compañía e utilizar as mans. 3. Non esquecer que hai vida debaixo do mantel. 4. Ter predisposición para explorar novas fronteiras. 5. Dedicar tempo. 6. Saber aplicar o punto exacto de picante en cada prato e postura.

Para aquelas persoas que queredes saber máis sobre gastrosexoloxía, hoxe, ás 21:00 horas, Monica Novas impartirá un taller no Pazo Quinteiro da Cruz de Meis, en Ribadumia. Esperamos a vosa crónica!

Aproveitamos a entrada de hoxe para dar difusión ao evento organizado pola Galipedia este sábado en Compostela.

A Wikipedia en galego vén de acadar os 75.000 artigos únicos, con máis de 2.000.000 de edicións e case 30.000 usuarios rexistrados, dos cales 300 son usuarios activos. Esta bonita restra de cifras ben vale de escusa para a organización dun galencontro, que terá lugar este sábado 17 de setembro entre as 10.30 e as 14.00 horas.

Trátase dunha xornada aberta sobre a Galipedia, e a ela queda convidado a todo o público interesado, sen importar o seu grao de coñecementos sobre a edición wiki. Aquelas persoas que así o desexaren poden achegarse á Cidade da Cultura, onde, na sala 2 da Biblioteca de Galicia, un grupo de galipedistas conformado por administradores e usuarios moi activos, impartirá un obradoiro de edición, ao que seguirá un coloquio aberto.

Non é imprescindible mais si é moi recomendable traer o ordenador portátil da casa, pois traballaremos conectados á WIFI da biblioteca.

O Festival da Poesía do Condado celebra esta fin de semana a súa edición número vinte e cinco, e faino co lema “Sen as mulleres non hai revolución”. Organizado pola Sociedade Cultural e Deportiva local e dedicado ás loitas feministas, xunta “cultura, reivindicación e festa” durante varios días no recinto amurallado de Salvaterra de Miño.

{Fonte: Nova en Baía Edicións}

Extracto traducido dun texto de Guillermo Abril para El País.

Di Dian Hanson que todos nos sentimos atraídos, en xeral, “polas cousas que saen cara a fóra”. Pero o culto ao pene tivo as súas fases. E non sempre crecentes. Na antiga Grecia, os actores de teatro adoitaban colocarse un enorme falo para que o público distinguise os personaxes masculinos. A mesma palabra fascinación, por exemplo, ten a súa orixe nun amuleto con forma de órgano masculino que os romanos adoitaban gardar para espantar o mal de ollo. E tamén en Roma, durante as festas en honra ao deus Baco, os cidadáns adoitaban sacar enormes penes en procesión. Este costume existe hoxe a varios miles de quilómetros de distancia, en Kawasaki (Xapón). Chámano o Kanamara Matsuri ou Festival do Pene de Metal, durante o cal exhiben un xigantesco órgano polas rúas da cidade. A tradición remóntase, ao parecer, a unha epidemia de sífilis ocorrida hai 300 anos.

Queridas amigas e amigos do postporno: esta semana tedes unha cita ineludible na Coruña. As compañeiras de NOMePISESoFREGHAO, un colectivo de mulleres feministas do barrio de Monte Alto, organizan Corpos e Linguasex, unhas xornadas nas que aprenderemos a usar as mentes o os corpos como ferramentas de liberación. Apuntádesvos, non?

Serán os días 28, 29 e 30 de xullo, no Centro Social Atreu. Na primeira xornada, presentarase Pornoterrorismo, un libro co que Diana Torres, o máximo expoñente deste concepto político-artístico, fai un ataque brutal aos piares que mantén en pé unha sociedade “heteropatriarcal e castradora” Despois de Diana chegará Lucía Egaña, a directora do documental Mi sexualidad es una creación artística. A fita mergúllase entre os colectivos e persoas que dende o ano 2000 traballan e crean postporno na cidade de Barcelona. Sete entrevistas que mostran as motivacións de homes e mulleres que apostan por unha pornografía alternativa e inclusiva. Por último, proxectarase a curtametraxe galego-catalá O dente negro.

O venres haberá obradoiros para coñecer mellor as nosas sexualidades e os nosos corpos. O sábado, o derradeiro día, festa na rúa con xantar colectivo, intercambio de experiencias e moitas “sorpresas”. E antes de rematar, e como guinda deste xeitoso pastel, ofrecerase unha pequena degustación da Mostra Marrana que este mes de xullo celebrouse en Barcelona. Ides resistir a tanto pecado?

En 2010, BccN 1ª Mostra de cinema Creative Commons foi a primeira de tales características no mundo.

Na edición 2011, do 18 ao 22 de maio, BCCN será un festival realizado baixo licenza Creative Commons e baixo a premisa ‘copia este festival’, con licenza Atribución NonComercial-Compartir Igual. Isto significará que o propio festival podera ser descargado, copiado, reversionado, distribuído e proxectado de maneira gratuíta en calquera recuncho do mundo.

Con isto, quérese promover a organización do mesmo evento en diferentes lugares do mundo, multiplicando o efecto divulgador do acontecemento e reducindo o traballo de montaxe do festival ás súas particularidades loxísticas.

“Cando estás aí fóra e recibes a caricia dunha suave brisa,
até o último pelo do teu corpo pode sentilo.
A conexión coa natureza é total,
Tanto é así que as roupas simplemente sobran.”

Barbara Pollard, xardineira nudista e propietaria dos Xardíns de Abbey House.

O VI Día Mundial da Xardinaxe Nudista terá lugar o próximo sábado 14 de maio de 2011. Máis información na páxina web oficial e mesmo nunha wiki ao efecto.

*******************************************************************************

ÚLTIMO AVISO PARA NAVEGANTES X

*******************************************************************************