14032011
AlejandroTobar | Categoría:
Cultura libre, Eventos |
Demos conta aquí o sábado da maratón galipédica. O reto consistía en redactar e aquelar un total de 500 novos artigos en 24 horas. Ben, pois non se superou. Pouco lle faltou. Creáronse 451. É, con todo, un bo resultado, por varios motivos:
1) Tendo en conta que ao ano a enciclopedia galega medra en 12.000 artigos, e que polo tanto falamos de 1000 ao mes, daquela 451 nun só día non é nada mala cifra.
2) O galego escalou un posto na clasificación de linguas segundo o número total de artigos, atrás queda agora o nepalí e diante o hindi.
3) O desafío wikipédico tiña o seu aquel, porque nas condicións de edición estaba especificado que non se creasen artigos mínimos ou sen formato. Así, por exemplo, evitouse que se chantasen entradas desleixadas coma a do avión Adam RA-14 Loisirs e primou a creación, por así dicilo, aquelada, feitiña; valla de exemplo o artigo do físico Walter Kohn ou a obra A arte da pintura, bastante representativos do que se pedía.
Dos 451 novos artigos cos que a Galipedia conta dende o pásado día 12, hai un que dá moito xogo para este proxecto do Ferrete. Trátase do titulado Os cregos na cultura popular galega, que foi elaborado a partir de diversa bibliografía, onde figura por suposto tanto o cantigueiro coma o refraneiro, tan sabios.
O crego da miña aldea
ten as cirolas rachadas
que llas rachou a silveira
por correr tras das criadas.
O crego de Escravitude
leva a criada na burra,
na primeira carballeira
dálle unha sacudidura.
O cura de San Martiño
éche moi bo confesor,
que confesou á criada
debaixo do cobertor.
E para pechar un refrán:
“Cregos, frades, curuxas e choias, dou ó diaño esas catro xoias.”
